पान:कार्यसंस्कृती.pdf/८८

उत्तम ब्रीदवाक्याची जादू "आम्ही इथं उत्तम जहाजं बांधू, शक्य असेल तर तशी बांधताना फायदा कमवू. अगदी आवश्यकता पडल्यास तोटाही सहन करू; पण काहीही, अगदी काहीही झालं तरी फक्त उत्तमच जहाजं बांधू." १८८६ साली कॉलीस बन्टींग्टननं आपल्या कंपनीचं ब्रीदवाक्य असं ठरवलं होतं. जमल्यास फायदा मिळवू, प्रसंगी तोटाही सोसू; पण ध्येय एकच, उत्तम फक्त उत्तमच जहाजं बांधू. न्यूपोर्ट न्यूज शिपबिल्डिंग आणि ड्राय डॉक कंपनी या दोन कंपन्यांचा मालक कॉलीसनं ठरवलं होतं एकच ते म्हणजे उत्तम जहाजं बांधणं. फायदा आणि तोटा जे होईल ते होईल. अर्थात हे सांगण्याची बिलकूल गरज नाही की कॉलीसची कंपनी ही एक सर्वश्रेष्ठ कंपनी होती. कॉलीसच्या यशाचं गमक होतं एक जबरदस्त असं ध्येय असणं. मला वाटतं कुठल्याही कंपनीच्या किंवा अगदी व्यक्तीच्यादेखील यशाची पहिली पायरी असते जबरदस्त असं ब्रीदवाक्य. असं वाक्य किंवा असं ध्येय, की ते नुसतं असण्यानं अंगात ऊर्जेचा एक प्रचंड असा स्रोत निर्माण होतो. योग्य दिशा पकडली जाते. योग्य साधनं उभी केलीच जातात आणि स्वच्छ अशी योजना उमलून समोर येते. ही उत्तम ब्रीदवाक्याची जादू आहे, किमया आहे. ८७ कार्यसंस्कृती